மைக்ரோவேவில் தண்ணீர் சுட வைக்கலாமா?

பல விதமான கதைகள் நமக்கு மெயிலில் வருவதுண்டு. இக்கதைகள் பெரும்பாலும் உண்மையாக இருப்பதில்லை, வெறும் கட்டுகதைகளே. அது போன்று வந்த இந்த மெயிலைப் பாருங்கள்.

"சில நாட்களுக்கு முன் காப்பி போடுவதற்காக என் மகன் மைக்ரோவேவ் அவனில் தண்ணீர் சுட வைத்தான். சுட வைத்த நேரம் முடிந்த பின் அதனை எடுத்த பொழுது நீர் கொதிக்கவில்லையே என அவன் பார்க்கும் பொழுது , அந்த தண்ணீர் அப்படியே எரிமலை போல் பொங்கி அவன் முகத்தில் அடித்தது. அதில் அவனுக்கு பலத்த தீக்காயங்கள் ஏற்பட்டன. நீங்களும் மைக்ரோவேவில் தண்ணீர் கொதிக்க வைக்கும் பொழுது ஜாக்கிரதையாய் இருக்கவும்."

இது உண்மைச் சம்பவமா, கட்டுக்கதையா எனத்தெரியவில்லை. ஆனால் இதில் குறிப்பிடப்பட்டிருக்கும் சம்பவம் நடக்கச் சாத்தியக் கூறுகள் இருக்கிறதா? அதைப் பற்றி தெரிந்து கொள்ளத்தான் இந்த பதிவு. வழக்கம் போல் ஒரு வரியில் பதில் சொல்ல வேண்டுமானால்,

இச்சம்பவம் நடக்க சாத்தியக் கூறுகள் உள்ளது, ஆனால் நடப்பதற்கான வாய்ப்பு மிகவும் குறைவு.

இனி சற்று விபரமாகப் பார்க்கலாம். இது நடக்கக் காரணம் 'அதிசூடேற்றம்' (SuperHeating). அப்படின்னா ஒரு திரவம், அதன் கொதிக்கும் சூட்டை விட அதிகமாகச் சூடாக்கப்படுதல். இப்படி நடக்கும் பொழுது மிக விரைவில் அந்த திரவம் ஆவியாகி விடும். அது திடீரென வெளியேறும் பொழுது அந்த திரவம் வெடிப்பது போலத் தெரிகிறது. ஆனால் இப்படி நடக்க சூழ்நிலைகள் சரியாக அமைய வேண்டும். இந்தப் படத்தைப் பாருங்களேன்.



இது எப்படி நடக்கிறது? நீரை சுட வைக்கும் பொழுது அதன் மாலிக்யூல்களின் கட்டமைப்பு (துடிகள் - தமிழ்) உடைந்து ஆவியாக மாறுகிறது. இப்படி ஒரே சமயத்தில் பல மாலிக்யூல்கள் இடையேயான கட்டமைப்பு உடைந்தால்தான் ஒரு சிறு குமிழி போல் ஆவி சேர்கிறது. இதில் மேலும் மேலும் ஆவி சேர்ந்து பெரிதாகி அது தண்ணீரின் மேல் மட்டத்திற்கு வந்து வெடித்து காற்றில் சேர்கிறது. இதுதான் சாதாரணமாக நீர் கொதிப்பதின் ரகசியம்.

ஆனால் சில சமயங்களில் அந்த முதல் ஆவிக்குமிழிகள் உண்டாகாமல் போவதுண்டு. அந்த சமயங்களில் நீர் கொதிநிலையையும் தாண்டி மேலும் சூடாவதுண்டு. அந்நிலையின் பெயர்தான் 'அதிசூடேற்றம்' (SuperHeating). அப்படி இருக்கும் பொழுது அந்த பாத்திரத்தை ஆட்டினாலோ அல்லது அதில் சர்க்கரை, காப்பித்தூள் என எதையாவது போட்டாலோ அது இந்த ஆவிக் குமிழிகள் உண்டாக ஏதுவாகிறது. இப்படி ஒரேடியாக இக்குமிழிகள் உண்டாகி மேலே வருவதால், அது ஒரு வெடிப்பு போல தோன்றுகிறது. இது மைக்ரோவேவில் உண்டாக சாத்தியங்கள் அதிகம். ஏனென்றால் இங்கு தண்ணீர் இருக்கும் பாத்திரம் சூடாகாமல் மைக்ரோவேவ் கதிர்கள் நேராக தண்ணீரைச் சூடாக்குவதினால் இது போல ஆகலாம்.

இப்படி ஆக வேண்டும் என்றால், தண்ணீர் கொதிக்க வைக்கப்படும் பாத்திரம் கண்ணாடிப் பாத்திரங்கள் போல் மிக வழவழப்போடு இருக்கவேண்டும். தண்ணீர் சாதாரணமாக கொதிக்க எடுத்துக்கொள்ளும் நேரத்தை விட அதிக நேரம் சுட வைக்கப் பட வேண்டும். பாத்திரத்தில் ஒரு சிறிய கீறல் இருந்தால் கூட இது போல் நடக்காது.

இது போல் நடக்காமலிருக்க

• தண்ணீரை கொதிக்க வைக்கும் பொழுது அதற்குண்டான நேரத்தை விட அதிகம் வைக்க வேண்டாம்.
• மைக்ரோவேவிலேயே ஒரு நிமிடம் விட்டு விட்டு, அதன் பின் எடுங்கள்.
• வெளியே எடுத்த பின் அதில் காப்பி, சர்க்கரை போன்றவற்றை போடும் பொழுது முடிந்த அளவு விலகி நின்று கொள்ளுங்கள்.
  
• ஒரு மரத்தாலான கலப்பான் (அதாங்க Stirrer) ஒன்றை தண்ணீரில் போட்டு அதன் பின் கொதிக்க வையுங்கள்.

கேள்வியை முன் வைத்த Sridhar Venkat அவர்களுக்கு நன்றி.

மேலும் விபரங்களுக்கு

சுட்டி 1
சுட்டி 2
சுட்டி 3